ಕರ್ಲ ಕಟ್ಟ್‌ದ ಉರ್ಲು (ಬಾಲೆ-ಮುಗುಡುದ ಕತೆ)
ತುಲುವೆರೆನ ಬಾಯಿಡ್ ನಿಚ್ಚೊಲಾ ಒಂಜತ್ತ್ಂಡೊಂಜಿ ಬಾಯ್ಪಾತೆರೊಲು/ಗಾದೆಲು ನಲ್ತೊಂದಿಪ್ಪುವ. ಕೆಲವೊಂಜೆತ ಅರ್ಥೊ ಕೇಂಡಿನೆಟ್ಟಿಗೆ ತೆರಿಂಡ ಕೆಲವೊಂಜೆಕ್ ಬಾರೀ ಗಂತ್‌ದ ಅರ್ಥೊ ಇಪ್ಪುಂಡು. ಒಂಜೊಂಜೆಕ್ ಒಂಜೊಂಜಿ ಕತೆಕ್‌ಲು. ಕತೆ ಎಂಚಿನನೇ ಇತ್ತ್ಂಡಲಾ ಪ್ರತಿಯೊಂಜಿ ಪಾತೆರೊದುಲಯಿ ನಮ್ಮ ಎಡ್ಡೆಪ್ಪು ದೆಂಗ್‌ದಿಪ್ಪುಂಡತ್ತಂದೆ ಹಾಲ್ ಏಪೊಗುಲಾ ಇಪ್ಪುಜಿ. ಅಂಚಿನ ಒಂಜಿ ಪಾತೆರೊಲೆಡ್ 'ಬಾಲೆ ಮೀನ್‌ನ್ಲಾ ಮುಗುಡು ಮೀನ್‌ನ್ಲಾ ಒಟ್ಟುಗು ಕಜಿಪು ಮನ್ಪೆರ ಬಲ್ಲಿ' ಪನ್ಪುನವ್ಲಾ ಒಂಜಿ. ಈ ಪಾತೆರೊದ ಪಿರವು ಒವ್ವಾಂಡಲಾ ವೈಜ್ಞಾನಿಕ ಕಾರಣೊ ಇಪ್ಪೆರಲಾ ಯಾವು, ಅವೆನ್ ಜನೊಕ್ಲೆನ ಮಂಡೆಗ್ ಪೊಗ್ಗಯೆರ ಬಂಙ ಆವೂಂದ್ ಒಂಜಿ ಕತೆ ಮೊಡೆದಿಪ್ಪೆರಲಾ ಯಾವು. ಏರೆಗ್ ಗೊತ್ತು? ನಮ ಆ ಕತೆ ದಾದ ಪಂದ್ ತೂಕ. ನಂಬುವರಾ ಬುಡ್ಪರಾ ಓದುನಕ್ಲೆಗ್ ಬುಡ್ನವು. ಆಂಡ ಕತೆತ ನೀತಿನ್ ಮಾತ್ರ ಬುಡೊರ್ಚಿ. ಒಂಜಿ ಊರುಡು ಕಂಡನಿ ಬುಡೆದಿ ಇತ್ತೆರ್. ಅಕ್ಲೆಗ್ ಸುರುತ ಒಂಜಿ ಆನ್ ಮಗೆ, ಅಯಿರ್ದ್ ಬುಕ್ಕೊದವು ಮೂಜಿ ಪೊನ್ನು ಜೋಕುಲು. ಒಂಜಿ ದಿನೊ ಮಗೆ ಒಂಜಿ ಚೆಂಡ್ ಮಲ್ಲಿಗೆ ಕೊಂಡತ್ತ್‌ದ್ ಬಾಕಿಲ್ದ ಮೇಲ್‌ಡ್ ದೀದ್ ಅಪ್ಪೆಡ, "ಇಂದೆನ್ ಯೇರ್ ತರೆಕ್ ದೀಪೆರೋ ಅಕ್ಲೆನ್ ಯಾನ್ ಮದಿಮೆ ಆಪೆ" ಪಂದ್ ಪನ್ಪೆ. ಆಯೆ ಪಿದಾಯಿ ಪೋಯಿನೆರ್ದ್ ಬುಕ್ಕೊ ಮೆಗ್ದಿನಕ್ಲ್ ಬತ್ತ್‌ದ್ ಆ ಪೂವುಗು ಕೈ ಪಾಡುವೆರ್. ಅಪಗ ಅಪ್ಪೆ ಮಗೆ ಪಂಡಿನ ಪಾತೆರೊನು ತೆರಿಪಾವಲ್, ಸುರುತ ರಡ್ಡ್ ಜನೊ ಮೆ...