ಕರ್ಲ ಕಟ್ಟ್‌ದ ಉರ್ಲು (ಬಾಲೆ-ಮುಗುಡುದ ಕತೆ)
ತುಲುವೆರೆನ ಬಾಯಿಡ್ ನಿಚ್ಚೊಲಾ ಒಂಜತ್ತ್ಂಡೊಂಜಿ ಬಾಯ್ಪಾತೆರೊಲು/ಗಾದೆಲು ನಲ್ತೊಂದಿಪ್ಪುವ. ಕೆಲವೊಂಜೆತ ಅರ್ಥೊ ಕೇಂಡಿನೆಟ್ಟಿಗೆ ತೆರಿಂಡ ಕೆಲವೊಂಜೆಕ್ ಬಾರೀ ಗಂತ್‌ದ ಅರ್ಥೊ ಇಪ್ಪುಂಡು. ಒಂಜೊಂಜೆಕ್ ಒಂಜೊಂಜಿ ಕತೆಕ್‌ಲು. ಕತೆ ಎಂಚಿನನೇ ಇತ್ತ್ಂಡಲಾ ಪ್ರತಿಯೊಂಜಿ ಪಾತೆರೊದುಲಯಿ ನಮ್ಮ ಎಡ್ಡೆಪ್ಪು ದೆಂಗ್‌ದಿಪ್ಪುಂಡತ್ತಂದೆ ಹಾಲ್ ಏಪೊಗುಲಾ ಇಪ್ಪುಜಿ.
ಅಂಚಿನ ಒಂಜಿ ಪಾತೆರೊಲೆಡ್ 'ಬಾಲೆ ಮೀನ್‌ನ್ಲಾ ಮುಗುಡು ಮೀನ್‌ನ್ಲಾ ಒಟ್ಟುಗು ಕಜಿಪು ಮನ್ಪೆರ ಬಲ್ಲಿ' ಪನ್ಪುನವ್ಲಾ ಒಂಜಿ. ಈ ಪಾತೆರೊದ ಪಿರವು ಒವ್ವಾಂಡಲಾ ವೈಜ್ಞಾನಿಕ ಕಾರಣೊ ಇಪ್ಪೆರಲಾ ಯಾವು, ಅವೆನ್ ಜನೊಕ್ಲೆನ ಮಂಡೆಗ್ ಪೊಗ್ಗಯೆರ ಬಂಙ ಆವೂಂದ್ ಒಂಜಿ ಕತೆ ಮೊಡೆದಿಪ್ಪೆರಲಾ ಯಾವು. ಏರೆಗ್ ಗೊತ್ತು?
ನಮ ಆ ಕತೆ ದಾದ ಪಂದ್ ತೂಕ. ನಂಬುವರಾ ಬುಡ್ಪರಾ ಓದುನಕ್ಲೆಗ್ ಬುಡ್ನವು. ಆಂಡ ಕತೆತ ನೀತಿನ್ ಮಾತ್ರ ಬುಡೊರ್ಚಿ.
ಒಂಜಿ ಊರುಡು ಕಂಡನಿ ಬುಡೆದಿ ಇತ್ತೆರ್. ಅಕ್ಲೆಗ್ ಸುರುತ ಒಂಜಿ ಆನ್ ಮಗೆ, ಅಯಿರ್ದ್ ಬುಕ್ಕೊದವು ಮೂಜಿ ಪೊನ್ನು ಜೋಕುಲು. ಒಂಜಿ ದಿನೊ ಮಗೆ ಒಂಜಿ ಚೆಂಡ್ ಮಲ್ಲಿಗೆ ಕೊಂಡತ್ತ್‌ದ್ ಬಾಕಿಲ್ದ ಮೇಲ್‌ಡ್ ದೀದ್ ಅಪ್ಪೆಡ, "ಇಂದೆನ್ ಯೇರ್ ತರೆಕ್ ದೀಪೆರೋ ಅಕ್ಲೆನ್ ಯಾನ್ ಮದಿಮೆ ಆಪೆ" ಪಂದ್ ಪನ್ಪೆ. ಆಯೆ ಪಿದಾಯಿ ಪೋಯಿನೆರ್ದ್ ಬುಕ್ಕೊ ಮೆಗ್ದಿನಕ್ಲ್ ಬತ್ತ್‌ದ್ ಆ ಪೂವುಗು ಕೈ ಪಾಡುವೆರ್. ಅಪಗ ಅಪ್ಪೆ ಮಗೆ ಪಂಡಿನ ಪಾತೆರೊನು ತೆರಿಪಾವಲ್, ಸುರುತ ರಡ್ಡ್ ಜನೊ ಮೆಗ್ದಿನಕ್ಲ್ ಪೂವುನು ಬುಡ್ದ್ ಪೋಪೆರ್. ಆಕೇರಿದ ಮೆಗ್ದಿ ಹಟೊಟು ಅಣ್ಣೆ ಮೆಗ್ದಿನ್ ಮದಿಮೆ ಅವಯೆಂದ್ ಪಂಡ್‌ದ್ ಆ ಪೂವುನು ದೆತೊಂದ್ ತರೆಕ್ ದೀವೊನುವಲ್. ಅಣ್ಣೆ ಬತ್ತೆ, ವಿಷಯೊ ಗೊತ್ತಾಂಡ್, ಆಯೆ ನಿರ್ಧಾರ ಬದಲ್ಪುಜೆ. ಎಲ್ಯ ಮೆಗ್ದಿನೊಟ್ಟುಗೆ ಆಯನ ಮದಿಮೆಗ್ ನಿಗಂಟಾಂಡ್. ಈತಾನಗ ಮದಿಮಾಲ್ ತಪ್ಪಾವಂದಿನಂಚನೆ ಆಲೆನ್ ಒಂಜಿ ಕೋಣೆಡ್ ಪಾಡ್ದ್ ಆಲೆಗ್ ತಾರಾಯಿ ಪೆರೆಪುನ ಕೆಲಸೊ ಕೊರ್ಪೆರ್. ಆಲ್ ಒಂಜಿ ಪೆರ್ಗುಡೆಗ್ ತಾರಾಯಿ ಕೊರ್ಪುವ ಆಸೆ ತೋಜಿಪ್ಪಾದ್, ಅಯಿಡ್ದ್ ಒಂಜಿ ಸುರಂಗೊಮಾರ್ಗೊನ್ ದೆಪ್ಪಾದ್, ಆಲ್ ಅಲ್ಪರ್ದ್ ತಪ್ಪಾವೊಂದು ಪೋಪಲ್.
ಪೋದು ಕೆರೆಬರಿಟಿತ್ತಿನ ಒಂಜಿ ಜಮನೇರೊಲ್ದ ಮರತ ಮಿತ್ತ್ ಬರ್ತ್‌ದ್ ಕುಲ್ಲುವಲ್. ಇಲ್ಲದಕ್ಲ್ ಮಾಂತೆರ್ಲಾ ಆಲೆನ್ ನಾಡುವೆರ್. ಆಲ್ ತಿಕ್ಕುಜಲ್. ಆಲೆನ ಮಲ್ಲ ಅಕ್ಕ ಮೋರೆ ದೆಕ್ಯೆರ ಪೋನಗ, ಒಸರ್ದಂಚಿ ಬನ್ನಗ ಅಲೆನ ಮೇಲ್ಗ್ ಒಂಜಿ ಪನಿ ನೀರ್ ಬೂರುಂಡು. ಮೆಗ್ದಿ ಮರಟಿಪ್ಪುನ ಗೊಂತಾಪುಂಡು. ಅಪಗ ಅಕ್ಕ ಮೆಗ್ದಿಗ್ ಪನ್ಪಲ್,
“ಒರೊ ಜಪ್ಪು ಜಮನೇರೊಲೋ
ಪಾಡಿ ದೊಂಪ ಮಾಲ್ಂಡೇ
ಕಡ್ತಿ ಇರೆ ಬಾಡ್ಂಡೇ
ಅಡಿ ಉನ್ಪು ಸೆಟ್ಟ್ಂಡೇ
ಮುತ್ತಿನ ಬಚ್ಚಿರೆ ಉಲುಂಗುಂಡೇ
ಕೂಡಿ ಸಭೆ ಬಿರಿಪ್ಪುಂಡೇ
ಬತ್ತಿ ಬಿನ್ನೆರ್ ಬಡವುಡುಲ್ಲೆರ್
ಒರೊ ಜಪ್ಪೋ ಜಮನೇರೊಲೋ"
ಅಪಗ ಮರತ ಮೇಲ್ದ ಮೆಗ್ದಿ ಪನ್ಪಲ್,
"ಪಾಡಿ ದೊಂಪೊ ಮಾಲಡ್
ಅಡಿ ಉನ್ಪು ಸೆಟ್ಟಡ್
ಮುತ್ತಿನ ಬಚ್ಚಿರೆ ಉಲುಂಗಡ್
ಕೂಡಿ ಸಭೆ ಬಿರಿಯಡ್
ಬಿತ್ತಿ ಬಿನ್ನೆರ್ ಬಡಾವಡ್
ದುಂಬುದ ಕಾಲೊಡ್ ಅಕ್ಕಾಂದ್ ಲೆತ್ತೆನೇ
ನನದ ಕಾಲೊಡು ಅತ್ತಿಗೇಂದ್ ಲೆಪ್ಪೊಡೇ
ಯಾನ್ ಜಪ್ಪೂಜಿ"
ಅಯಿರ್ದ್ ಬುಕ್ಕೊ ಆಲೆನ ನಾನೊರ್ತಿ ಅಕ್ಕ ಬರ್ಪಾಲ್, ಆಲೆನ ಪಾತೆರೊಗ್ಲಾ ತಂಗಡಿ ದುಂಬುದಂಚನೆ ಉತ್ತರೊ ಕೊರ್ಪಲ್. ಆಯಿರ್ದ್ ಬುಕ್ಕೊ ಅಪ್ಪೆ ಬರ್ಪಲ್.
“ಒರೊ ಜಪ್ಪು ಜಮನೇರೊಲೋ
ಪಾಡಿ ದೊಂಪ ಮಾಲ್ಂಡೇ
ಕಡ್ತಿ ಇರೆ ಬಾಡ್ಂಡೇ
ಅಡಿ ಉನ್ಪು ಸೆಟ್ಟ್ಂಡೇ
ಮುತ್ತಿನ ಬಚ್ಚಿರೆ ಉಲುಂಗುಂಡೇ
ಕೂಡಿ ಸಭೆ ಬಿರಿಪ್ಪುಂಡೇ
ಬತ್ತಿ ಬಿನ್ನೆರ್ ಬಡವುಡುಲ್ಲೆರ್
ಒರೊ ಜಪ್ಪೋ ಜಮನೇರೊಲೋ"
ಅಪಗ ಮರತ ಮೇಲ್ದ ಮಗಲ್ ಪನ್ಪಲ್,
"ಪಾಡಿ ದೊಂಪೊ ಮಾಲಡ್
ಅಡಿ ಉನ್ಪು ಸೆಟ್ಟಡ್
ಮುತ್ತಿನ ಬಚ್ಚಿರೆ ಉಲುಂಗಡ್
ಕೂಡಿ ಸಭೆ ಬಿರಿಯಡ್
ಬಿತ್ತಿ ಬಿನ್ನೆರ್ ಬಡಾವಡ್
ದುಂಬುದ ಕಾಲೊಡ್ ಅಪ್ಪೇಂದ್ ಲೆತ್ತೆನೇ
ನನದ ಕಾಲೊಡು ಮಾಮೀಂದ್ ಲೆಪ್ಪೊಡೇ
ಯಾನ್ ಜಪ್ಪೂಜಿ"
ಅಕೇರಿಗ್ ಅಣ್ಣೆ ಬರ್ಪೆ, ಆಯೆ ಸಂಗಡಿಡ ಪನ್ಪೆ,
“ಒರೊ ಜಪ್ಪು ಜಮನೇರೊಲೋ
ಪಾಡಿ ದೊಂಪ ಮಾಲ್ಂಡೇ
ಕಡ್ತಿ ಇರೆ ಬಾಡ್ಂಡೇ
ಅಡಿ ಉನ್ಪು ಸೆಟ್ಟ್ಂಡೇ
ಮುತ್ತಿನ ಬಚ್ಚಿರೆ ಉಲುಂಗುಂಡೇ
ಕೂಡಿ ಸಭೆ ಬಿರಿಪ್ಪುಂಡೇ
ಬತ್ತಿ ಬಿನ್ನೆರ್ ಬಡವುಡುಲ್ಲೆರ್
ಒರೊ ಜಪ್ಪೋ ಜಮನೇರೊಲೋ"
ಅಪಗ ಮರತ ಮೇಲ್ದ ಸಂಗಡಿ ಪನ್ಪಲ್,
"ಪಾಡಿ ದೊಂಪೊ ಮಾಲಡ್
ಅಡಿ ಉನ್ಪು ಸೆಟ್ಟಡ್
ಮುತ್ತಿನ ಬಚ್ಚಿರೆ ಉಲುಂಗಡ್
ಕೂಡಿ ಸಭೆ ಬಿರಿಯಡ್
ಬಿತ್ತಿ ಬಿನ್ನೆರ್ ಬಡಾವಡ್
ದುಂಬುದ ಕಾಲೊಡ್ ಅಣ್ಣಾಂದ್ ಲೆತ್ತೆನೇ
ನನದ ಕಾಲೊಡು ಕಂಡನೀಂದ್ ಲೆಪ್ಪೊಡೇ
ಯಾನ್ ಜಪ್ಪೂಜಿ"
ಅಪಗ ಅಣ್ಣೆನೇ ಮರಕ್ಕ್ ಬರ್ತುವೆ. ಸಂಗಡಿ ಮರತ್ತ ಗೆಲ್ಲ್‌ಗೆಲ್ಲ್‌ಗ್ ಪೋಪಲ್, ಅಣ್ಣೆಲಾ ಗೆಲ್ಲ್‌ಗೆಲ್ಲ್‌ಗ್ ಪೋಪೆ. ಆಲ್ ಇರೆಇರೆಕ್ಕ್ ಪೋಪಲ್, ಆಯೆಲಾ ಇರೆ ಇರೆಕ್ಕ್ ಪೋಪೆ. ಆಲ್ ಕೆರೆಕ್ ಲಾಯಿಪುವಲ್, 'ಬಾಲೆ' ಮೀನಾಪಲ್. ಆಯೆಲ ಕೆರೆಕ್ ಲಾಯಿಪುವೆ, 'ಮುಗುಡು' ಮೀನಾಪೆ. ಮುಗುಡು ಮೀನ್ ಬಾಲೆ ಮೀನ್‌ನ್ ನಿಂಗುಂಡು. ಒರಿ ಗಾಲೊ ಪಾಡುನಾಯೆ ಮುಗುಡು ಮೀನ್ ಪತ್ತ್‌ದ್ ಇಲ್ಲಡೆಗ್ ಕೊಂಡೊಡ್ ಪೋಪೆ. ಅಯಿತ ಬಂಜಿದುಲಾಯಿ ಬಾಲೆ ಮೀನ್ ಇಪ್ಪುಂಡು. ಆ ಬಾಲೆ ಮೀನ್ 'ಎನನ್ ಆಯನ್ ಪಾಡ್ನ ಪಾತ್ರೊಡು ಪಾಡೊರ್ಚಿ, ಆಯನ್ ಬೆಯ್ಪಾಯಿನ ಪಾತ್ರೊಡು ಬೆಯ್ಪಾವೊರ್ಚಿ' ಂದ್ ಪನ್ಪುಂಡು. ಅಂಚೆನೇ 'ಬಾಲೆ' ಬೊಕ್ಕ 'ಮುಗುಡು' ಮೀನ್‌ನ್ ಒಂಜೇ ಪಾತ್ರೊಡು ಬೆಯ್ಪಾವುಜೆರ್.
ಒಂಜಿ ಕಡೆತ ಕತೆ ಈಡೆಗ್ ಉಂತುಂಡು, ಆಂಡ ನಾನೊಂಜಿ ಕತೆ ಒಂತೆ ಬೇತೆ ರಿತಿಡೇ ದುಂಬರಿಯುಂಡು.
ಬಲೆ, ಅವೆನ್ಲಾ ತೆರಿಯೊನುಗ.
ಈ ಪೂವುನ್ ತರೆಕ್ ದೀವೊನುನಾಲೆನ್ ಯಾನ್ ಮದಿಮೆ ಆಪೆ ಪಂಡ್‌ದ್ ಪಲಯೆ ಬಾಸೆ ದೀದ್ ಮೀಯೆರ ಪೋಯೆ. ಆಯೆ ಮೀದ್ ಬನ್ನಗ ಆಯನ ಸಂಗಡಿ ಆ ಪೂವುನ್ ತರೆಕ್ ದೀದಿಪ್ಪುನೆನ್ ತೂಯೆ. ಆಯೆ ದೀತಿನ ಬಾಸೆದಂಚ ಸಂಗಡಿನ್ ಮದಿಮೆ ಆಯೆರಾಂದ್ ಪತ್ಯೆರ ಪೋಯೆ. ಇಸಯ ಗೊಂತಾಯಿನ ಸಂಗಡಿ ತಪ್ಪಾವೊಂದು ಬಲಿತಲ್. ಇಲ್ಲೊರ್ಮೆ ಬಲಿತಲ್. ಇಲ್ಲ್ ಜತ್ತಲ್, ಜಾಲೊರ್ಮೆ ಬಲಿತಲ್. ಜಾಲ್ ಜತ್ತಲ್, ತಾರೆದ ತೋಟದಂಚಿ ಬಲಿತಲ್. ಪಲಯೆ ಆಡೆಗ್ಲಾ ಬೆರಿಪತೊಂದು ಪೋಯೆ. ತೋಟ ಜತ್ತಲ್, ಕಂಡೊದ ಪುಣಿಬರಿಯೆ ಬಲಿತಲ್. ಸುದೆಬರಿಯೆ ಪೋಯಲ್. ಪಲಯೆ ಆಡೆಗ್ಲಾ ಬನ್ನಗ ಸುದೆಕ್ ದಂಗ್‌ದಿನ ಒಂಜಿ ಮರಕ್ ಮಿತ್ತರ್ಯಲ್. ಆಯೆಲಾ ಮರಕ್ ಮಿತ್ತರ್ಯೆ. ಆಲ್ ಗೆಲ್ಲ್‌ಗೆಲ್ಲ್‌ಗ್ ಪೋಯಲ್, ಪಲಯೆಲಾ ಗೆಲ್ಲ್‌ಗೆಲ್ಲ್‌ಗ್ ಪೋಯೆ. ಆಲ್ ಇರೆಇರೆಕ್ಕ್ ಪೋಯಲ್, ಆಯೆಲಾ ಇರೆ ಇರೆಕ್ಕ್ ಪೋಯೆ. ಅಕೇರಿಗ್ ಆಯೆ ಪತ್ಯೆರ ಬನ್ನಗ ತಿಕ್ಯೆರ ಬಲ್ಲೀಂದ್ ಸುದೆಕ್ ಲಾಗಿವಲ್. ಪಲಯೆಲಾ ಒಟ್ಟುಗ್ ಸುದೆಕ್ ಲಾಗಿಯೆ. ಅಲ್ಪ ಅಕ್‌ಲ್ ಮಾಯಕ ಆಪೆರ್.
ಮಾಯಕ ಆಯಿನ ತಗೆ-ತಂಗಡಿ ಸುದೆಟ್ ಬಾಲೆ ಮೀನ್ ಬೊಕ್ಕ ಮುಗುಡು ಮೀನಾದ್ ಪುಟ್ಟುವೆರ್. ಒಂಜಿ ದಿನ ಏರೋ ಒರಿ ಮೀನ್ ಪತ್ಯೆರ ಪೋಪೆ. ತಗೆ-ತಂಗಡಿ ರಡ್ಡ್ ಮೀನ್‌ಲಾ ಒಟ್ಟುಗ್ ಬಲೆಕ್ ಬೂರ್ಯ. ಆಯೆ ಬಾರಿ ಕುಸಿಟ್ ಇಲ್ಲಡೆ ಪತೊಂದು ಬತ್ತ್‌ದ್ ಬೊಡೆದಿಡ ಕೊರ್ಯೆ. ಆಲ್ ರಡ್ಡೆನ್ಲಾ ಸಜ್ಜಿ ಮಲ್ತ್‌ದ್ ಕಜಿಪುಗು ಬಿಸಲೆಡ್ ಬೆಯ್ಯೆರ ದೀಯಲ್. ಆಂಡ ಅವು ಬೆಯ್ನಗ ನೆತ್ತೆರ್ ಉರ್ಕರೊಂದು ಬರ್ಪುಂಡು. ನೆನ್ ತೂದು ಪೋಡಿದ್ ಆಲ್ ಬಿಸಲೆನೇ ಪತೊಂದು ಪೋದು ಇಲ್ಲ ಪಿರವುಡ್ ಗುಪ್ಪುವಲ್.
ಕಜಿಪು ಗುತ್ತುನಲ್ಲ್ ರಡ್ಡ್ ದೈ ಕೊಡೀಂಡ್. ಅವ್ವೇ ಬಸಲೆ ಬೊಕ್ಕ ಪದ್ಪೆ. ಒಂಜಿ ದಿನ ಇಲ್ಲ ಯಜಮಾನ್ದಿ ಕಜಿಪುಗು ದಾಲ ದಾಂತಿನ ಪೊರ್ತುಡು ಈ ಬಸಲೆ ಪದ್ಪೆನ್ ಕುತ್ತ್ ಕೊನತ್‌ದ್ ಮೂರ್ದ್ ಬೆಯ್ಯೆರ ದೀಪಲ್. ಬೆಯ್ನಗ ನೆತ್ತೆರ್ ಉರ್ಕರೊಂದು ಬರ್ಪುಂಡು. ಪೋಡಿದ್ ಪೋಯಿನ ಇಲ್ಲ ಯಜಮಾನ್ದಿ ಬಿಸಲೆನ್ ಪತೊಂದು ಪೋದು ಇಲ್ಲ ಪಿರವು ಗುಪ್ಪುವಲ್.
ಗುತ್ತುನಲ್ಪ ರಡ್ಡ್ ಮರ ಕೊಡಿಪುಂಡು. ಅವ್ವೇ ಪೆಲತಮರ ಬೊಕ್ಕ ಪೆಜತಮರ. ಒಂಜಿ ದಿನ ಮರತ ಬೇಲೆದಕ್ಲು ಇಲ್ಲಗ್ ಪಾಡೆರೆ ರಡ್ಡ್ ಮರನ್ಲಾ ಕಡ್ತ್‌ದ್ ಮೂಪು ಮಲ್ಪುವೆರ್. ಪೆಲತ್ತಲಾ ಪೆಜತ್ತಲಾ ಜೊತೆ ಮಲ್ತ್‌ದ್ ಬಾಯಿಕೀಲ್ ಪಾಡ್ದ್ ಗೋಡೆಗ್ ಉಂತಾವೆರ್. ಮನದಾನಿ ತೂನಗ ಅಯಿಟ್ಟ್ ನೆತ್ತೆರ್ ಅರಿಯೊಂದುಂಡು. ಆನಿರ್ದ್ ಬೊಕ್ಕ ಪೆಲತ್ತ ಮರಲಾ ಪೆಜತ್ತ ಮರಲಾ ಸಂದ್ ಪಾಡುಜೆರ್. ಉ್ಂದು ತಗೆ-ತಂಗಡಿನ ಕತೆ. ಬಾಲೆಮೀನ್-ಮುಗುಡುಮೀನ್‌ದ ಕತೆ.
ಈ ಕತೆ ಕಾಲಿ ಬಾಲೆ-ಮುಗುಡು, ಪದ್ಪೆ-ಬಸಲೆ, ಪೆಲ-ಪೆಜತ್ತ ಬಗ್ಗೆ ಪನ್ಪುನತ್ತಂದೆ, ತಗೆ-ತಂಗಡಿನ ಒಂಜಿ ಪವಿತ್ರ ಸಂಬಂದೊದ ಬಗ್ಗೆಲಾ ಪನ್ಪುಂಡು. ಕರ್ಲ ಕಟ್ಟ್‌ದ ಉರ್ಲುದ ಕತೆ ಪನ್ಪುಂಡು. ವೈಜ್ಞಾನಿಕವಾದ್‌ಲಾ ತಗೆ-ತಂಗಡಿ ಮದಿಮೆ ಆಂಡ, ಒಂಜೇ ಬರಿತಕ್‌ಲ್ ಮದಿಮೆ ಆಂಡ ಸಂತೇಸಿ ಗಡಿಪ್ಪುಜಿ, ಸಂತಾನ ಮುತ್ತುಂಡು ಪನ್ಪಿ ನಂಬೊಲಿಗೆ ಉಂಡು.
ನಮ್ಮ ಪೆರಿಯಕ್ಲ್ ಮೀನ್‌ದ ಕತೆಟ್ಟ್, ತಪ್ಪುದ ಕತೆಟ್ಟ್, ಮರೊತ ಕತೆಟ್ಟ್ ಸಂಬಂದೊಲೆನ ಕತೆ ಪಂತೆರ್. ಪ್ರಕೃತಿನ್ ದೇವೆರ್ಂದ್ ನಂಬಿ ನರಮಾನಿ, ದೇವೆರ್ ಮೀನಾತೆರ್ಂದ್ ನಂಬಿ ಜನಮಾನಿ ಪ್ರಕೃತಿಯೇ ಸತ್ಯೊ ಪಂದ್ ತೆರಿಯೊನೊಡು. ಜನಪದ ಕತೆಕುಲು ಬಜೀ ಕತೆಕುಲತ್ತ್, ಅವ್ ತುಲುವೆರೆನ ಬದ್‌ಕ್‌ದ ಮೂಲಕತೆಕುಲಾದುಲ್ಲ. ಪ್ರತಿಯೊಂಜಿ ಕತೆಲಾ ಪ್ರಕೃತಿದ ಸಗ್ತಿನ್ ನಮ್ಮೆದುರು ಬುಡ್ಪಾದ್ ಕೊರ್ಪ, ಅವೆನ್ ಅರಾದ್ ನಟ್ಟುನ ಗುಣ ನಮಡ ಬೋಡು.
.jpeg)
Comments
Post a Comment