ತುಳುವ ಮಹಾಸಭೆತ ವಿಜ್ಞಾಪನೆ

 ಪಣಿಯಾಡಿದಾರ್ ಪಂದೇ ಪುದರ್ ಪೋದಿಪ್ಪುನ ಶ್ರೀನಿವಾಸ ಉಪಾಧ್ಯ ಪಣಿಯಾಡಿ( S U Paniyadi) ಮೆರೆನ ಉಮೇದ್‌ಡ್ 1928 ನೇ ಇಸ್ವಿದ ಸೆಪ್ಟೆಂಬರ್ 23ನೇ ತೇದಿದಾನಿ 'ತುಳುವ ಮಹಾಸಭೆ' ಸ್ಥಾಪನೆ ಆಪುಂಡು. ಈ ತುಳುವ ಮಹಾಸಭೆತ ವಿಜ್ಞಾಪನೆಡ್ ಪಣಿಯಾಡಿದಾರ್ ಬರೆತಿನ ಒಂಜಿ ಲೇಖನೊನು ತಿರ್ತ್ ಕೊರೊಂದುಲ್ಲೆ. ಮೂಲತಃ ಕನ್ನಡೊಡ್ ಇಪ್ಪುನ ಈ ಲೇಖನೊನು ಶ್ರೀ ಮುರಳೀಧರ ಉಪಾಧ್ಯೆರ್ ತುಳುಕ್ ತರ್ಜುಮೆ(ಭಾಷಾಂತರ) ಮಲ್ತ್‌ದೆರ್. ಒಂಜಿ ಚಾರಿತ್ರಿಕ ದಾಖಲೆಲಾ ಆದಿಪ್ಪುನ ಈ ವಿಜ್ಞಾಪನೆಡ್ ತುಳುಬಾಸೆ, ತುಳು ಚಳವಳಿ, ತುಳುನಾಡ್‌ದ ಬಗ್ಗೆ ಪಣಿಯಾಡಿದಾರೆನ ಗ್ರಯಿಕೆ ಎಂಚ ಇತ್ತ್ಂಡ್ಂದ್ ಗೊತ್ತಾಪುಂಡು.

'ದೇಶಾಭಿಮಾನಿಲೇ, ಒಂತೆ ವರ್ಸೊಡ್ಡಿಂಚಿ ತುಳುವೆರೆಡ ಒಂಜಿ ರೀತಿದ ಎಚ್ಚರ ಆದ್ ಅವ್‌ಲೌಲು ಪಾತೆರ-ಕತೆ ಮಾತ್ರ ನಡತೊಂದುಂಡು. ಆಂಡಲಾ, ಮಾತಾ ಒಟ್ಟಾದ್ ಒಂಜಿ ಕೆಲಸನ್‌ಲಾ ಸುರು ಮಲ್ದಿಜ. ಈ ಸಂಗತಿದ ಮಿತ್ತ್ ಇಂಚಪ ಜಿಲ್ಲೆದ ಪತ್ರಿಕೆಡ್ ನಾಲೈನ್ ಲೇಖನೊಲು ಅಚ್ಚಾಯ. ನೆಡ್ದಾವರ ಮಾತಾ ಸಂಗತಿಲೆನ ಚರ್ಚೆ ಅವಂದೆ ಇತ್ತ್ಂಡಲಾ ಒಂತೆ ಸಂಗತಿಲೆನ ಚರ್ಚೆ ಆಂಡ್. ನೆಡ್ದಾವರ ಒಂತೆ ಜನೊಕುಲೆಗ್ ಉಮೇದ್‌ಲಾ, ಧೈರ್ಯಲಾ ಬತ್ತ್‌ದ್, 'ತುಳುವ ಮಹಾಸಭೆ' ಪನ್ಪಿ ಸಂಸ್ಥೆನ್ ಡಿಸ್ಟ್ರಿಕ್ಟ್ ಬೋರ್ಡ್ ಪದುಕೆರಾದಿಪ್ಪುನ ಡಾ. ಯು. ರಾಮಚಂದ್ರ ರಾಯೆರನ ಗುರ್ಕಾರ್ಮೆಡ್ ಸೇರ್ದಿನ ಸಭೆತಗುಲು 23-9-1928ದಾನಿ ಒಡಿಪುಡ್ ಸ್ಥಾಪನೆ ಮಲ್ತೆರ್. ನೆತ್ತ ಬೆನ್ನಿದ ಕಂಡ ಒಡಿಪು ಮಾತ್ರ ಅತ್ತ್, ಇಡೀ ತುಳುನಾಡ್ ನೆತ್ತ ಬೆನ್ನಿದ ಕಂಡ ಆದುಂಡು. ಪಂಡ, ನೆತ್ತ ಸಭೆಕುಲೆನ್ ತುಳುನಾಡ್‌ದ ಒವ್ವೇ ಜಾಗ್‌ಡ್ ಮಲ್ಪಾವೊಲಿ. ತುಳುನಾಡ್‌ದಗುಲು ಮಾತೆರ್ಲಾ ನೆತ್ತ ಪದುಕೆರಾವೊಲಿ. ಆಂಡ, ಇಂಚಿನ ಸಂಸ್ಥೆದ ಅಗತ್ಯ, ಉದ್ದೇಶದ ಸಂಗತಿಡ್ ಒಂತೆ ಜನೊಕುಲೆಗ್ ಗುಮಾನಿ ಉಂಡು. ಒಂತೆ ಜನ ತಪ್ಪು ತೆರಿವೊಂದೆರ್, ಆಯಿನೆಡ್ದಾವರ ಎಂಕುಲು ಈ ವಿಷಯೊಡು ರಡ್ಡ್ ಪಾತೆರ ಪನ್ಪಿನ ಅಗತ್ಯ ಉಂಡು.

ತುಳುವೆರೆನ ಬಗ್ಗೆ ಒವ್ವೇ ಪಾತೆರ ಸುರುಮಲ್ಪೊಡಾಂಡಲಾ ಸುರುಟ್ಟು ತುಳುವೆರ್ ಏರ್ಂದ್ ವಿಮರ್ಶೆ ಮಲ್ಪೊಡು. ದಾಯೆಗ್ ಪಂಡ, ತುಳುವೆರೆನ್ ಮಸ್ತ್ ಜನ ತಪ್ಪು ತೆರಿಯೊಂದೆರ್. ತುಳುನಾಡ್‌ದ ಕೆಲವೆರೆಗ್, ತುಳುನಾಡ್‌ದ ಪಿದಾಯಿದಗಲೆಗ್ ತುಳುವೆರೆನ ವಿಷಯೊಡ್ ಸರಿಯಾಯಿನ ಕಲ್ಪನೆ ಇಜ್ಜಿ. ತುಳುವೆರ್ ಪಂಡ ಬ್ರಾಣೇರ್ ಮಾತ್ರ ಪನ್ಪಿನ ಕೆಲವೆರೆನ ಕಲ್ಪನೆಗ್ ಆಧಾರ ಇಜ್ಜಿ. ತುಳು ಪಾತೆರ್ಪಿನಗುಲು ಬಿರಣೆ‌ರ್ ಮಾತ್ರ ಅತ್ತ್, ಬೇತೆ ಮಾತಾ ಜಾತಿದಗುಲುಲಾ ಉಲ್ಲೆರ್. ತುಳುವೆರ್ ಪಂಡ ಒಂಜಿ ಜಾತಿದಗುಲೂಂದ್ ತೆರಿಯೊಂದಿನಗುಲುಲ್ಲೆರ್; ಅವು ಬಜೀ ಸುಳ್ಳು. ತುಳು ಪಾತೆರುನಕ್‌ಲ್ ಒಂಜೇ ಜಾತಿದಗುಲತ್ತ್. ಮಸ್ತ್ ಜಾತಿದಗುಲು ಉಲ್ಲೆರ್, ಬ್ರಾಹ್ಮಣ, ಬಿಲ್ಲವ, ಬಂಟ, ವಿಶ್ವಕರ್ಮ, ಮೊಗವೀರ, ಪರಿಶಿಷ್ಟ ಇಂಚಿನ ಮುಖ್ಯ ಜಾತಿದಗುಲು, ಬೇತೆ ಮಸ್ತ್ ಜಾತಿದಗುಲ್‌ಲಾ ಉಲ್ಲೆರ್. ತುಳುವೆರ್ ಪಂಡ ಒಂಜೇ ಧರ್ಮದಗುಲೂಂದ್‌ಲಾ ಪಣರೆಗ್ ಆಪುಜಿ. ತುಳುವೆರೆನ ಪೈಕಿ ಶೈವ, ವೈಷ್ಣವ, ಮಾಧ್ವ, ಭಾಗವತ, ಶಾಕ್ಯ, ಜೈನ, ಬೌದ್ಧ, ಕ್ರೈಸ್ತ, ಮಹಮ್ಮದೀಯ ಇಂಚಿನ ಧರ್ಮದಗುಲು ನಂಬುಗೆದಗುಲು ಉಲ್ಲೆರ್. ತುಳು ಪಾತೆರುನಗಲೆನ ಬೇತೆ ಒಂಜಿ ದೇಶ ಇತ್ತ್‌ದ್ ಅಲ್ತ್‌ಡ್ದ್ ಈ ಜನೊಕುಲು ಇಡೆಗ್ ಬತ್ತ್‌ದ್ ಮೂಲು ಬದ್‌ಕೊಂದು  ಉಪ್ಪುನಿಲಾ ಅತ್ತ್. ಈ ನಾಡ್‌ಗ್ ಪ್ರಾಕ್‌ದ ಕಾಲೊಡ್ದ್‌ಲಾ ತುಳು ಪನ್ಪಿನ ಪುದರ್ ಇತ್ತ್ಂಡ್. ಆಯಿನೆಡ್ದಾವರ ತುಳುನಾಡ್‌ಡ್ ಇತ್ತ್‌ದ್, ತುಳು ಬಾಸೆ ಪಾತೆರುನಗಲೆಗ್ ತೌಳವ ಅತ್ತ್ಂಡ ತುಳುವ ಪನ್ಪಿನ ಪುದರ್ ಬೈದ್ಂಡ್. ಪ್ರಾಕ್‌ದ ಕಾಲೊಡ್ ಮುಲ್ತುರ್ದ್ ಪೋದು ತಮಿಳ್‌ನಾಡ್‌ಡ್‌ ಬದ್‌ಕೊಂದಿತ್ತ್ಂಡಲಾ, ತುಳು ಬಾಸೆನ್ ಬುಡ್ದ್ ತಮಿಳ್ ಬಾಸೆನ್ ಪಾತೆರೊಂದಿತ್ಂಡಲಾ, ಒಂಜಿ ಜಾತಿದಗುಲು ತುಳುವ ವೆಲ್ಲಾಳ ಪನ್ಪಿನ ಪುದರ್‌ನ್ ಮದತ್‌ದಿಜೆರ್.

ತುಳುನ್ ಇಲ್ಲಡ್ ಪಾತೆರುನಗಲೆನ ಸಂಖ್ಯೆ 1921ನೆ ಇಸ್ವಿದ ಖಾನೇಷ್‌ಮಾರಿಡ್ 5,79,342 ಇತ್ತ್ಂಡ್. ಐಟ್ 41,517 ಮಾತ್ರ ನಮ್ಮ ಜಿಲ್ಲೆನ್ ಬುಡ್ದ್ ಬೇತೆ ಕಡೆಟಿಪ್ಪುನಗುಲು. ಮೊಗುಲು ಹೆಚ್ಚಾದ್ ಹಾಸನ, ಕಡೂರು, ಶಿವಮೊಗ್ಗ, ಮಲಬಾರ್, ಕೊಚ್ಚಿ, ತಿರುವಾಂಕೂರು, ಬೊಂಬಾಯಿ, ಮದ್ರಾಸ್‌ಡುಲ್ಲೆರ್. ತುಳುವೆರೆನ ಸಂಖ್ಯೆ ಕಮ್ಮಿ ಆವೊಂದು ಬರ್ಪಿನೆಕ್ಕ್ ಕೆಲವು ಕಾರಣೊಲುಲ್ಲ.

1. ಬೇತೆ ಊರುಗು ಪೋದು ಇಪ್ಪುನಗುಲು ಹೆಚ್ಚಾದ್ ತಂಕುಲ್ನ ಅಪ್ಪೆ ಬಾಸೆ ಕನ್ನಡಂದ್ ಪಣ್ಪೆರ್.

2. ತುಳುವೆಂದ್ ಪಣರೆ ನಾಚಿಕೆ ಆದ್ ಕೆಲವೆರ್ ಇಲ್ಲಡ್‌ಲಾ ಕನ್ನಡ ಬಾಸೆನೇ ಪಾತೆರ್ದ್ ಕನ್ನಡದಗುಲಾಪೆರ್.

3. ಬಾಸೆಲ್ ಮಿಶನ್ ಕರ್ನಾಟಕ ಮಿಶನ್ಂದ್ ಬದಲಾಯಿಬೊಕ್ಕ ಮಿಶನ್‌ದಗುಲೆನ ಪೈಕಿ ಮಸ್ತ್ ಜನ ತುಳುಬಾಸೆನ್ ಬುಡ್ದು ಕನ್ನಡ ಬಾಸೆನ್ ಪಾತೆರೊಂದುಲ್ಲೆರ್.

4. ಕೆಥೊಲಿಕ್ ಕ್ರಿಶ್ಚಿಯನ್ ಧರ್ಮೊಗು ಸೇರಿನಗುಲು ತುಳುಬಾಸೆನ್ ಪೂರ್ತಿ ಬುಡ್ದ್ ಕೊಂಕಣಿ ಭಾಷೆನೇ ಪಾತೆರ್‌ವೆರ್‌.

5. ಇಸ್ಲಾಂಗ್‌ ಸೇರಿನಗುಲು ಹೆಚ್ಚಾದ್ ಹಿಂದುಸ್ಥಾನಿ ಬಾಸೆನಿ, ಮಲೆಯಾಳಿ ಬಾಸೆನಿ ಪಾತೆರ್‌ವೆರ್‌.

ಇಂಚಿನ ಇಚಿತ್ರ ಸ್ಥಿತಿಡ್ದಾವರ ತುಳುಬಾಸೆ ಪಾತೆರುನಗಲೆನ ಸಂಖ್ಯೆ ಹೆಚ್ಚಾವಂದೆ ಇಪ್ಪುನ ಆಶ್ಚರ್ಯ ಅತ್ತ್. ಆಂಡ, ತುಳುನಾಡ್‌ಡ್ ಇತ್ತೊಂದು ಬೇತೆ ಬಾಸೆಲೆನ್ ಪಾತೆರುನಗಲೆಗ್‌ಲಾ ಹೆಚ್ಚಾದ್ ತುಳುಬಾಸೆ ತೆರಿದೇ ಇಪ್ಪುಂಡು.

1.ತುಳು ಅಪ್ಪೆಬಾಸೆ ಆದ್ ಇಪ್ಪುನಗುಲು

2. ತುಳು ತೆರಿದಿನಗುಲು

3. ತುಳುನಾಡ್‌ಡ್ ಇಪ್ಪುನಗುಲು

- ಇಂಚ ಮೂಜಿ ರೀತಿಡ್ ಅರ್ತ ಮನ್ತೊನೊಲಿ. ತುಳುನಾಡ್‌ಡ್ ಹೆಚ್ಚ್ ಕಮ್ಮಿ 10 ಲಕ್ಷ ಜನ ಉಲ್ಲೆರ್. ಆಯಿನೆಡ್ದಾವರ ತುಳುವೆರ್ ಪಂಡ, ಕರ್ನಾಟಕ, ಆಂಧ್ರ, ತಮಿಳ್, ಬಂಗಾಳಿ, ಗುಜರಾತಿ ಶಬ್ದೊಲೆನ ಅರ್ತ ಮಲ್ಪಿಲೆಕ್ಕನೆ ಅರ್ತ ಮಲ್ಪೊಡು ಅತ್ತಂದೆ ಬೇತೆ ವಾ ರೀತಿದ ಕಿಞ್ಞಾತಿಗೆದ ಅರ್ತ ಮಲ್ಪುನಿ ಸರಿ ಅತ್ತ್.

ತುಳುನಾಡ್ - ಈ ನಾಡ್ ಎಂಕುಲು ಇಂಚಪ ಕಲ್ಪನೆ ಮಲ್ತಿನ ಅತ್ತ್. ಪ್ರಾಕ್‌ದ ಕಾಲೊಡ್ದ್‌ಲಾ ಈ ನಾಡ್‌ಗ್ ತುಳು ಪನ್ಪಿ ಪುದರ್ ಇತ್ತ್ಂಡ್. ಪ್ರಾಕ್‌ದ ಗ್ರಂಥೊಲೆಡ್ ಐತ ಗಡಿಕುಲೆನ ವಿವರಣೆ ತಿಕ್ಕುಂಡು. ಇತ್ತೆದ ಗಡಿಕುಲೆಗ್‌ಲಾ ದುಂಬುದ ಕಾಲೊದ ಗಡಿಕುಲೆಗ್‌ಲಾ ಹೆಚ್ಚ್ ಕಮ್ಮಿ ಇಪ್ಪೊಲಿ. ಅವ್ವೊಂಜಿ ದೋಷ ಅತ್ತ್. ಮಸ್ತ್ ಕಾಲೊಡ್ದಿಂಚಿ ತುಳುನಾಡ್‌ದ ತನ್ನಾದಿಗೆನ್ ತುಳುವರಸೆರ್ ಕಾತೊಂದಿತ್ತೆರ್. ಕೊಂಕಣ, ಕೇರಳ, ಕರ್ನಾಟಕೊಲು ತುಳುತ್ವನ್ ರಟ್ಟಾವರ ಸಾಧ್ಯ ಇಜ್ಜಿ. ತುಳುನಾಡ್ ಕರ್ನಾಟಕೊದ ಸಾಮ್ರಾಜ್ಯದ ಅಂಕೆಡ್ ಬತ್ತಿಬೊಕ್ಕ ತುಳುವೆರ್ ತನ್ಕುಲೆನ ವೈಶಿಷ್ಟ್ಯನ್‌ಲಾ ಸಂಸ್ಕೃತಿನ್‌ಲಾ ಕಾತೊಂದಿತ್ತೆರ್‌. ಬ್ರಿಟಿಷೆರನ ಅರಸೊತ್ತಿಗೆ ಬತ್ತಿ ಬೊಕ್ಕ ಕರ್ನಾಟಕದ ಪ್ರಭಾವ ಹೆಚ್ಚಾದ್ ಸುರುಟ್ಟು 'ಕನ್ನಡ ಜಿಲ್ಲೆ' ಪಂದ್, ಇತ್ತೆ 'ದಕ್ಷಿಣ ಕನ್ನಡ' ಜಿಲ್ಲೆಂದ್ ಪುದರ್ ಬತ್ತ್‌ದ್ ಮುಲ್ತ ಸ್ಥಿತಿಗತಿಕ್‌‌ಲೆನ್ ತೂದು ತೆರಿನಗಲೆಗ್ ಉಂದು ಕರ್ನಾಟಕ ಪನ್ಪಿ ಗ್ರಯಿಕೆ ಆಂಡ ಹೆಚ್ಚಿದ ಆಶ್ಚರ್ಯೊದ ಸಂಗತಿ ಅತ್ತ್. ಅಂಚನೆ, ಪಡ್ಡಾಯಿದ ಕಡಲ್‌ದ ಏಳ್ ವಿಭಾಗೊಲೆನ್ ಒಂಜಿ ಕಡೆಟ್ ಕೊಂಕಣಂದ್, ಬೊಕ್ಕೊಂಜಿ ಕಡೆಟ್ ಕೇರಳಂದ್ ಪುದರ್ ದೀತಿನಿ ಕೇರಳ ಕೊಂಕಣದ ಅಭಿಮಾನಿಳು ಆದಿಪ್ಪೊಡು. ಅಂಚತ್ತಾಂಡ, ಈ ಪುದರ್‌ ಬೈದಿನ ಕಾಲೊಡು ತುಳುನಾಡ್ ಕೊಂಕಣ ಸಾಮ್ರಾಜ್ಯದ ಅಂಕೆಡ್, ಕೇರಳ ಸಾಮ್ರಾಜ್ಯೊದ ಅಂಕೆಡ್ ಇತ್ತ್ಂಡ್ಂದ್ ಎಣ್ಣೊಲಿ. ಆಂಡಲಾ, ಈ ರಡ್ಡ್ ಪುದರ್‌ಲ್ ತುಳುನಾಡ್ ಇಜ್ಜಿಂದ್ ಪನ್ಪುಜ. ಹೆಚ್ಚಿದ ಸಂಗತಿ ಮೂಲು ಅಗತ್ಯ ಇಜ್ಜಂದಿನಡ್ದಾವರ ತುಳುನಾಡ್ ಪನ್ಪಿ ಭೂಭಾಗ ಅವೇ ಪುದರ್‌ಡ್ ಪ್ರಾಚೀನ ಕಾಲೊಡ್ದುಲಾ ಇತ್ತ್ಂಡಲಾ, ಕರ್ನಾಟಕ-ಕೊಂಕಣ-ಕೇರಳಗ್ ಉಂದು ಸೇರಿನ ಅತ್ತ್ಂದ್ ಮಾತ್ರ ಪಣ್ಪೊ. ತುಳುನಾಡ್ ಅಂಚಿಂಚಿದ ನಾಡ್‌ಲೆನ ಲೆಕ್ಕನೇ ಭಾರಿ ಪ್ರಾಕ್‌ದ ಕಾಲೊಡ್ದೇ ಇತ್ತ್ಂಡ್ ಪನ್ಪಿನೆಕ್ ಎದ್‌ರ್ ಪಾತೆರ ಇಜ್ಜಿ.

ತುಳುಬಾಸೆ : ತುಳುಬಾಸೆ ತುಳುವೆರೆನಾತೇ ಪ್ರಾಕ್‌ದ ಬಾಸೆ. ತುಳುಬಾಸೆ ಪಂಡ ಕನ್ನಡೊದ ಅಪಭ್ರಂಶ ಪಣ್ಪಿ ಕೆಲವೆರೆನ ಕಲ್ಪನೆಗ್ ಅಡಿಮುದೆಲ್ ಇಜ್ಜಿ, ದ್ರಾವಿಡ ಬಾಸೆಲೆನ ಚರಿತ್ರೆನ್ ವಿಮರ್ಶೆ ಮಲ್ತ್ಂಡಲಾ, ಭಾಷಾಶಾಸ್ತ್ರದ ದೃಷ್ಟಿಡ್ ವಿಮರ್ಶೆ ಮಲ್ತ್ಂಡಲಾ ಒಯಿತಲಾ ಅಪಭ್ರಂಶ ಅತ್ತ್ಂದ್, ತಮಿಳ್, ಕರ್ನಾಟಕ, ಆಂಧ್ರ, ಮಲಯಾಳ ಲೆಕ್ಕನೇ, ಸ್ವತಂತ್ರ ಬಾಸೆಂದ್‌ಲಾ, ಮಾತ ಬಾಸೆಲಾ ಮೂಲದ್ರಾವಿಡ ಬಾಸೆಡ್ದ್ ಪುಟ್ಟುದಿನಂದ್‌ಲಾ ಭಾಷಾ ವಿಜ್ಞಾನಿಲು ತೆರಿಯಂದಿನ ಸಂಗತಿ ಅತ್ತ್. ಉಂದುಲಾ ಅತ್ತಂದೆ, ಉಚ್ಚಾರಣೆದ ವ್ಯತ್ಯಾಸೊಡು ಒಂಜೇ ಶಬ್ದೊಗು ಅರ್ತ ಬೇತೆ ಆಪಿನ ಇಚಿತ್ರನ್ ತೂಂಡ ತುಳುಬಾಸೆದ ವೈಶಿಷ್ಟ್ಯ ತೋಜುಂಡು. ತುಳುಬಾಸೆನ್ ಶಾಸ್ತ್ರೀಯ ದೃಷ್ಟಿಡ್ ಕಲ್ಪಂದೆ ಅಯಿತ ಪೊರ್ಲು ತೋಜಿದ್‌ ಬರಂದ್. ನನ ತುಳುಬಾಸೆದ ಸಾಹಿತ್ಯೊಡು ಇಂಚಿಪದ ಒಂತೆ ಮಸ್ತಿರೆಲು ಅತ್ತಂದೆ ಬೇತೆ ಒವ್‌ಲಾ ತಿಕ್ಕುಜಿ. ನನ ಪ್ರಾಕ್‌ದ ಸಾಹಿತ್ಯೊದ ವಿಚಾರೊಡು ಭಾಷಾಶಾಸ್ತ್ರಜ್ಞೆರನ ಅಭಿಪ್ರಾಯೊಲು ಬೇತೆ ಬೇತೆ ಉಂಡು, ತುಳುಕು ಪ್ರತ್ಯೇಕ ಲಿಪಿಲಾ ಉಂಡು. ಕನ್ನಡ ತೆಲುಗು ಲಿಪಿಕುಲೆಗ್ ಇಪ್ಪುನಾತೇ ಎತ್ಯಾಸ ತುಳು ಮಲಯಾಳ ಲಿಪಿಕ್‌ಲಾ ಉಂಡು. ಪ್ರಾಕ್‌ದ ಸಾಹಿತ್ಯ ತಿಕ್ಕ್‌ದಿಜಿ ಪನ್ಪಿ ಕಾರಣಡ್ದ್ ದುಂಬಗ್ ಸಾಹಿತ್ಯೊನ್ ಬುಲೆಪಾವರ ಬಲ್ಲಿಂದ್ ದಾಲ ಇಜ್ಜಿ. ನನ, ಮಿತ್ತ್ ಪಣ್ಪಿನ ಸಂಗತಿಲೆನ ಬಗ್ಗೆ ಇಚಾರ ಮಲ್ಪುಗ.

ತುಳುವೆರೆನ ಇತ್ತೆದ ಸ್ಥಿತಿ: ತುಳುವೆರ್ ತನ್ಕುಲೆಡ ಇತ್ತಿನೆನ್‌ ಮಾತೆನ್‌ಲಾ ಕಲೆವೊಂದಿಪ್ಪುನೆಡ್ದಾವರ ಅಗಲೆಡ ಸ್ವಾಭಿಮಾನ ಚಿಹ್ನೆನೇ ಇಜ್ಜಿಂದ್ ಆತ್ಂಡ್. ಇಲ್ಲಡ್ ಪಾತೆರುನ ಬಾಸೆ ಒಂಜಿ, ಪಿದಾಯಿಡ್ ವ್ಯವಹಾರ ಮಲ್ಪೊಡಾಯಿನ ಬಾಸೆ ಒಂಜಿ - ಇಂಚ ಆಯಿನೆಡ್ದಾವರ ಏತೋ ತುಳುವೆರ್ ಸಾರ್ವಜನಿಕ ಸಂಸ್ಥೆಲೆಡ್ ತನ್ಕುಲೆನ ಗ್ರಯಿಕೆನ್ ಪಣರೆಗಾವಂದೆ ಸೋಪುವೆರ್. ನೆಡ್ದಾವರ ಏತೋ ಮಲ್ಲ ತಪ್ಪುಲು ಆ‌ದ್‌ಪೋಪ. ಸಾರ್ವಜನಿಕ ಸಂಸ್ಥೆಲೆಡ್ ಇಂಗ್ಲಿಷ್ ಇಜ್ಜಿಂಡ ಕನ್ನಡೊಡು ಭಾಷಣೊಲೆನ್, ಚರ್ಚೆಲೆನ್ ಮಲ್ಪಾವುನೆಡ್ದಾವರ ಏತೋ ಜನ ತುಳುವೆರೆಗ್ ಅರ್ತ ಆವಂದೆ ಪೋಪುಂಡು. ಮಾತೆರ್ಲಾ ಕನ್ನಡ ಕಲ್ತಿನಗುಲತ್ತ್. ಒಂತೆ ಕಲ್ತಿನಗಲೆಗ್ ತೆರಿಯುಜಿ. ಇಂಚಾದ್, ತುಳುವೆರೆಗ್ ಆಪಿನ ಕಷ್ಟಲಾ ನಷ್ಟಲಾ ಆತೀತತ್ತ್. ಇಂಚಿನ ಸಂದರ್ಬೊಡು ತುಳು ಬಾಸೆಡ್ ಪಾತೆರ್ಪಿನಲಾ ತಪ್ಪು ಪನ್ಪಿನ ಕಲ್ಪನೆ ಮಸ್ತ್ ತುಳುವರೆಗ್ ಬೈದ್ಂಡ್. ಎಂಕಲ್ನ ದೇಸೊಡು ಕಾಂಗ್ರೆಸ್ ಒಂಜೆನ್ ಬುಡುಂಡ ಸಾರ್ವಜನಿಕ ಸಂಸ್ಥೆ ಬೇತೆ ಒವ್‌ಲಾ ಇಜ್ಜಿ. ಬೇಂಕ್ ಸೊಸೈಟಿಲೆನ್ ಬುಡುಂಡ ಜನೊಕುಲು ಒಂಜಿ ಕಡೆಟ್ ಒಟ್ಟಾವರ ಸಾಧ್ಯ ಇಜ್ಜಿ. ಕಾಂಗ್ರೆಸ್ ಚಳವಳಿ ಬಜೀ ರಾಜಕೀಯದ ಆದಿಪ್ಪುನೆಡ್ದಾವರ, ಅಭಿಪ್ರಾಯಭೇದ ಬೊಕ್ಕ ಬೇತೆ ಕಾರಣಡ್ದಾವರ ಮಾತೆರ್ಲಾ ಒಟ್ಟಾಪುಜೆರ್. ಅವು ಅತ್ತಂದೆ, ಜಾತಿ ಸಂಸ್ಥೆಲು ಮಸ್ತ್ ಉಲ್ಲ. ಅಯ್‌ಕುಲು ಮಾತಾ ತುಳುವೆರೆನ್ ಆಯಿನಾತ್ ಬೇತೆ ಬೇತೆ ಇಪ್ಪುಲೆಕ ಮಲ್ತೊಂದುಲ್ಲ. ತನ್ಕುಲು ಕರ್ನಾಟಕದಗುಲು ಪನ್ಪಿನ ಗ್ರಯಿಕೆ ಸಾಧ್ಯ ಇಜ್ಜಂದಿನೆಡ್ದಾವರ ತುಳುವೆರಾದ್ ಒವ್ವೇ ಒಂಜಿ ಚಳವಳಿನ್ಲಾ ಮಲ್ಪೆರೆ ಆಪುಂಡೂಂದ್, ತುಳು ಬಾಸೆಡೇ ತನ್ಕುಲೆನ ಗ್ರಯಿಕೆಲೆನ್ ಪಂಡ ಮರ್ಯಾದೆಗ್ ಕಮ್ಮಿ ಆಪುಜಿಂದ್ ತೆರಿಪಾದ್ ಕೊರ್ಪಿನ ಸುರುತ್ತ ಕರ್ತವ್ಯ. ತುಳುವೆರೆನ್ ತಮಿಳ್‌ದಗುಲು, ಕರ್ನಾಟಕದಗುಲು ಎಂಚ ಗೌರವ ಕೊರ್ದು, ಸಸಾರ ಮಲ್ಪಂದೆ ತೂಪೆರ್ಂದ್ ಅಗಲೆನ ಒಟ್ಟುಗು ಇತ್ತಿನಗಲೆಗ್ ಮಾತ್ರ ಗೊತ್ತುಂಡ್. ಏತೇ ಯೋಗ್ಯತೆ ಇತ್ತ್ಂಡಲಾ ತುಳುವ ಪನ್ಪಿ ಒಂಜಿ ಕಾರಣೊರ್ದ್ ಏತೋ ಸರ್ತಿ ಬಂಙ ಬರೊಡಾಪುಂಡು. ತುಳುವೆರ್ ಒಟ್ಟಾವಂದೆ ಇಪ್ಪುನವೆ, ಸ್ವಾಭಿಮಾನ ಇಜ್ಜಂದೆ ಇಪ್ಪುನವೆ ನೆಕ್ಕ್ ಮೂಲ ಕಾರಣ ಆದುಂಡು. ಆಯಿನೆಡ್ದಾವರ, ಎಂಕುಲು ತುಳುವೆರ್ ತುಳುನಾಡ್‌ಡ್ ತುಳು ಬಾಸೆಡೇ ಪತ್ತ್ ಸಮಸ್ತರೆನ ಕಾರ್ಯಕ್ರಮೊಲೆನ್, ಸಂಸ್ಥೆಲೆನ್ ನಡಪಾವುನ ನ್ಯಾಯ ಪನ್ಪಿನ ಸ್ವಾಭಿಮಾನ ತುಳುವೆರೆಡ ಸುರುಟ್ಟು ಬರ್ಪುಲೆಕ  ಮಲ್ಪುನ, ತುಳುವೆರೆಡ ಸಂಘಟನಾ ಶಕ್ತಿನ್ ಪುಟ್ಟಾವುನ ಸುರುತ್ತ ಕರ್ತವ್ಯ. ಇಂಚಿನ ಅಭಿಮಾನೊನು ಪುಟ್ಟಾವರೆ ತುಳುವೆರ್ ತುಳುನಾಡ್‌ಡ್ ಬದ್‌ಕೊಂದಿಪ್ಪುನಗುಲು, ದಕ್ಷಿಣ ಕನ್ನಡದಗುಲತ್ತ್ಂದ್ ತೆರಿಯೊನೊಡಾತ್ಂಡ್, ಆಯಿನೆಡ್ದಾವರ ತುಳು ಪನ್ಪಿನ ಪ್ರದೇಶೊಗು ಅವ್ವೇ ಪುದರ್ ದೀವೊಡು. ಈ ರೀತಿದ ಎಡ್ಡೆ ಚಳವಳಿನ್ ಸುರುಮಲ್ಪೆರೆ ತುಳುವೆರೆನ ಸಂಸ್ಥೆ ಅಗತ್ಯವಾಯಿನೆಡ್ದಾವರನೇ ಎಂಕಲ್ನ ಸಂಸ್ಥೆ ಪುಟ್ಟುದುಂಡು. ಕರ್ನಾಟಕ ರಾಜ್ಯೊಡು ತುಳುವೆರೆನ್ ತುಳುವೆರಾದೇ ಇಪ್ಪೆರ ಬುಡ್‌ದು ದುಂಬು ಪೋಪಿನ ಎಡ್ಡೆ. ಅವೆನ್ ಬುಡ್ದ್, ತುಳುವೆರೆನ್ ಕನ್ನಡಿಗೆರಾದ್ ಮಲ್ಪುನೆಟ್ಟ್ ತುಳುವೆರೆಗ್ ಆವಡ್, ಕರ್ನಾಟಕ ಪ್ರಾಂತೊಗು ಆವಡ್, ಅಂಚನೇ ಭಾರತ ದೇಶಸೊಗಾವಡ್ ಎಡ್ಡೆ ಆವಂದ್.

ಎಂಕುಲ್ನ ಉದ್ದೇಶ ಎಂಚಿನಂದ್ ಸ್ಪಷ್ಟವಾದ್ ಪಣ್ಣಿನಡ್ದಾವರ ಜನಕುಲೆನ ಮನಸ್ಸ್‌ಡ್ ಬೇತೆ ಬೇತೆ ಕಲ್ಪನೆಗ್ ಅವಕಾಶ ಬರಂದ್. ತುಳುಬಾಸೆನ್ ಐತ ಇತ್ತೆದ ಕಂಗಾಲ್ ಸ್ಥಿತಿಡ್ದ್ ಬಚಾವ್ ಮಲ್ತ್‌ದ್, ತುಳುಬಾಸೆಗ್ ಸಾರ್ವಜನಿಕ ಸಂಸ್ಥೆಲೆಡ್ ಮರ್ಯಾದೆ ತಿಕ್ಕರೆ ಬೋಡಾದ್ ಬೇಲೆ ಮಲ್ಪೊಡು. ನೆಕ್ಕ್ ಬೋಡಾಯಿನ ಸಾಧನೊಲೆನ್ ನಾಡ್ದ್ ಎಂಕ್ಲೆಗ್ ಬೋಡಾಯಿನ ಬೇಲೆ ಮಲ್ಪೊಡು.ಈ ಪ್ರದೇಶೊಗು ಇತ್ತೆ ಇಪ್ಪುನ ಪುದರ್‌ನ್ ಗೆತ್ತ್‌ದ್ 'ತುಳುನಾಡ್' ಪನ್ಪಿ ಪುದರ್‌ನ್ ದೀವೊಡು. ನೆಕ್ಕ್ ಕೆಲವು ಅಡ್ಡಿಲಾ ಉಂಡು. ಇತ್ತೆದ ರಾಜಕೀಯ ವಿಭಾಗೊಡಿಪ್ಪುನ ದಕ್ಷಿಣ ಕನ್ನಡ ಜಿಲ್ಲೆ ಪೂರಲಾ ತುಳುನಾಡ್ ಅತ್ತ್. ಬಡಕಾಯಿಡ್ ಕರ್ನಾಟಕದ ಭಾಗೊಲಾ, ತೆಂಕಾಯಿಡ್ ಮಲಯಾಳದ ಭಾಗೊಲಾ ಸೇ‌ರ್ದ್ಂಡ್. ಮಲಯಾಳದ ಭಾಗೊನು ಮಲಯಾಳೊಗ್ ಬುಡ್ದ್ ಕೊರ್ದು, ಕರ್ನಾಟಕೊದ ಭಾಗೊನು ಇತ್ತೆದ ಉತ್ತರ ಕನ್ನಡ ಜಿಲ್ಲೆಗ್ ಸೇರಾವೊಡು. ಉಂದು ಕಷ್ಟದ ಸಂಗತಿ ಆಂಡಲಾ ಪ್ರಯತ್ನ ಮಲ್ತ್‌ದ್ ತೋಜಾವೊಡು. ಗಡಿಕುಲೆನ್ ನಿಶ್ಚಯ ಮಲ್ಪುನೆಟೇ ಮಸ್ತ್ ಬಂಙ ಉಂಡು. ಇತ್ತೆದ ಪ್ರಾಂತೊಲೆನ ವಿಭಾಗೊಲೆಡ್ ಏತ್ ಸಮಸ್ಯೆ ಉಂಡಾ ಆತೇ ಸಮಸ್ಯೆ ನೆಟ್ಟ್‌ಲಾ ಉಂಡು. ಒಂಜೇ ಪ್ರಾಂತ್ಯೊದ ಆಳ್ಮೆ ಆಂಡ ಒಂತೆ ಸುಲಭ ಇತ್ತ್ಂಡ್. ಇಂಚಿ ಬೊಂಬಾಯೀ ಅಂಚಿ ಮದ್ರಾಸ್ ಈ ರಡ್ಡ್ ಪ್ರಾಂತೊಲೆನ ಸಾಯಲಾ ಬೋಡು. ಅಂಡಲಾ ಸಾಸಮಲ್ತ್ಂಡ ಈ ಬೇಲೆನ್ ಮಲ್ತ್‌ದ್ ತೋಜಾವೊಲಿ. ತಿರ್ಲ್ ಎಂಚಿನ ಪಂಡ ಇತ್ತೆ ಎಂಕಲ್ನ ಸುರುತ್ತ ಧ್ಯೇಯೊಲು- 

 1. ತುಳುನಾಡ್‌ದ ಸಂಘಟನೆ

2. ತುಳುಬಾಸೆದ ಬುಲೆಚಿಲ್

3. ತುಳುನಾಡ್‌ನ ಕುಡೊರ ಸ್ಥಾಪನೆ ಮಲ್ಪುನಿ.

ಪ್ರಾಂತರಚನೆ : ಇತ್ತೆ ಇಪ್ಪುನ ರಾಜ್ಯೊಲು ದುಂಬಗ್‌ಲಾ ಇಂಚೆನೇ ಇಪ್ಪಂದೆ ಹೆಚ್ಚ್ ಕಮ್ಮಿ ಆಪುಂಡು ಪನ್ಪಿನ ಪ್ರತಿ ಒರಿ ರಾಜಕಾರಣಿಗ್‌ಲಾ ಗೊತ್ತಿಪ್ಪುನ ಸಂಗತಿ. ಆವರೆಗಿಪ್ಪುನ ಪ್ರಾಂತೊಲೆನ ರಚನೆಡ್ ತುಳುವೆರ್ ಒವ್ ಭಾಗೊನು ದೆತೊನೊಡು ಪನ್ಪಿನ ಪ್ರಶ್ನೆಗ್ ಸರಿಯಾಯಿನ ಉತ್ತರ ಕೊರ್ಪಿನ ಸ್ಥಿತಿಟ್ ಇಜ್ಜಿ. ಈ ರೀತಿದ ತಾದಿಡೇ ಪೋವೊಡೂಂದು ಎಂಕಲ್ನ ಸಂಸ್ಥೆ ನಿಗಂಟ್ ಮಲ್ದಿಜಿ. ಯೋಚನೆ ಮಲ್ತ್‌ದ್ ಒವ್ ಸಾಧ್ಯನಾ ಅವೆನೇ ನಿಶ್ಚಯ ಮಲ್ಪುವ. ಈ ಚಳವಳೊಕು ಸಂಬಂಧ ಇತ್ತಿನಗಲೆಡನೆ ಬೇತೆ ಬೇತೆ ಅಭಿಪ್ರಾಯ ಇಪ್ಪುನೆಡ್ದಾವರ ಈ ಪಾತೆರ ಪಣೊಡಾಪುಂಡು.

1. ತುಳುನಾಡ್‌ನ್ ಪ್ರತ್ಯೇಕವಾದ್ ದೀದ್ ಕಮಿಶನರೆನ ಪ್ರಾಂತೊನು ಮಲ್ಪೊಡು. ಈ ಪಕ್ಷದಗಲೆಡ ಹೈಕೋರ್ಟ್ ಬೊಕ್ಕ ವಿಶ್ವವಿದ್ಯಾನಿಲಯೊಗು ಬೋಡಾದ್ ಬೇತೆ ಒಂಜಿ ಪ್ರಾಂತೊಡು ಸೇರೊಡು ಪನ್ಪಿ ಅಭಿಪ್ರಾಯಲಾ ಉಂಡು.

2. ತುಳುನಾಡ್‌ನ್ ಜಿಲ್ಲೆ ಆದ್ ದೀವೊಂದು ಕರ್ನಾಟಕ ಪ್ರಾಂತೊಗೇ ಸೇರ್ಸಾವೊಡು. ತುಳುನಾಡ್ ತನ್ನ ಸಂಸ್ಕೃತಿ ಶಿಕ್ಷಣೊಡು ಸ್ವಾತಂತ್ರ್ಯ ದೀವೊಂದು ಬಾಕಿ ಮಾತಾ ವ್ಯವಹಾರೊಲೆಗ್ ಬೋಡಾದ್ ಕರ್ನಾಟಕದ ಒಟ್ಟುಗು ಸೇರ್ದ್ ಇಪ್ಪೊಡು. ತುಳುನಾಡ್ ಕರ್ನಾಟಕ ಪ್ರಾಂತೊಗು ಸೇರಿನ ಒಂಜಿ ಜಿಲ್ಲೆಯಾದಿಪ್ಪೊಡು.

3. ಸಂಯುಕ್ತ ಪ್ರಾಂತೊನು ರಚನೆ ಮಲ್ಪೊಡೂಂದು ಮೂಜನೆದ ಪಕ್ಷ. ಕೊಡಗು, ಬ್ರಿಟಿಷ್ ಮಲಬಾರ್ ಬೊಕ್ಕ ತುಳುನಾಡ್‌ನ್ ಸೇರಾದ್ ಪಡ್ಡಾಯಿ ಕರಾವಳಿ ಸಂಯುಕ್ತ ಪ್ರಾಂತ (United Provincess of West Coast) ರಚನೆ ಮಲ್ಪೊಡು. ಶಿಕ್ಷಣೊಡು ಮೂಜಿ ನಾಡ್‌ದಗುಲುಲಾ ತನ್ಕುಲೆನ ಸ್ವಾತಂತ್ರ್ಯನ್ ದೀವೊಂದು ಬಾಕಿ ಮಾತಾ ವ್ಯವಹಾರೊಡು ಒಟ್ಟಾದಿಪ್ಪೊಡೂಂದ್ ಈ ಪಕ್ಷದಗಲೆನ ಅಭಿಪ್ರಾಯ.

ಈ ರೀತಿದ ಬೇತೆ ಬೇತೆ ಅಭಿಪ್ರಾಯಾಲು ನಮನ ಉಲಾಯಿ ಇತ್ತೆನೇ ಇಪ್ಪುನೆಡ್ದಾವರ ನೆತ್ತ ಎಡ್ಡೆ ಪಡ್ಕೆನ್‌ ಶ್ರೇಯಸ್ಸ್‌ನ್‌ ವಿಚಾರ್ತ್‌ದ್ ಇಂಚಿನವೇ ಬೋಡೂಂದ್ ನಿರ್ಧಾರ ಮಲ್ಪುನ ವಿಷಯ ಈ ತುಳುನಾಡ್‌ದ ಜನೊಕುಲೆಗ್ ಸೇರ್ದ್ಂಡ್. ಆಯಿನೆಡ್ದಾವರ, ಎಂಕಲ್ನ ಸಂಸ್ಥೆ ಇತ್ತೆ ಒವ್ವೇ ಅಭಿಪ್ರಾಯೊನ್‌ಲಾ ದೀವೊನಂದೆ ಮಾತೆರೆಗ್ಲಾ ಒಪ್ಪಿಗೆ ಆಯಿನ ಉದ್ದೇಶೊನೇ ದೀವೊಂದುಂಡು.

ರಡ್ಡ್ ಸಂಘೊಲೆನ ಆಗತ್ಯ : ಬಾಸೆದ ಬುಲೆಚ್ಚಿಲ್‌ಗ್ ಒಂಜಿ ಪ್ರತ್ಯೇಕ ಸಂಸ್ಥೆ, ತುಳುನಾಡ್‌ದ ಸ್ಥಾಪನೆ ಮಲ್ಪರೆ ಬೇತೆನೇ ಒಂಜಿ ಸಂಸ್ಥೆ ಅಗತ್ಯ ಪನ್ಪಿನ ಎಂಕ್ಲೆಗ್ ಗೊತ್ತಿಜ್ಜಂದಿನ ಅತ್ತ್. ಆಂಡ ಇತ್ತೆದ ಪರಿಸ್ಥಿತಿಟ್ ರಡ್ಡ್ ಸಂಸ್ಥೆಲೆನ್ ಸುರುಮಲ್ತ್‌ದ್ ಬೇಲೆ ಮಲ್ಪುನಿ ಬಂಙ ಆಯಿನೆಡ್ದಾವರ ಒಂಜೇ ಸಂಸ್ಥೆನ್ ಮಲ್ತ್‌ದ. ಬೆನ್ಪಿನಗುಲು ದುಂಬು ಬತ್ತಿನೆಟ್ಟಿಗೆ, ಆಯಿನಾತ್ ಬೇಗ ಸಾಹಿತ್ಯ ಸಂಸ್ಥೆನ್ ಬೇತೆ ಮಲ್ಪುವ. ನೆಟ್ಟ್ ಸಾಹಿತ್ಯ ಪ್ರೇಮಿಲು ಸೇರಿನೆಡ್ದಾವರ ತುಳು ಸಾಹಿತ್ಯದ ಬೆನ್ನಿ ಪೊರ್ಲುಡು ನಡಪುಂಡು.'

 

ಎಸ್.ಯು. ಪಣಿಯಾಡಿ, 1928(ತರ್ಜುಮೆ - ಮುರಳೀಧರ ಉಪಾಧ್ಯ)